Gal 1 | WSK | STEP | Ani apostle Paul. Ani kari saki apostle ura imi bitirikko me aga bangorman. Mena. Jesus Kristus ko Nuet Kaem ilak ani ura imi bitirikko agiting te beteman. Jesus kueram bare aking Kaem patowaram se barasam.

Galatians 1

Den gira

1 Ani apostle Paul. Ani kari saki apostle ura imi bitirikko me aga bangorman. Mena. Jesus Kristus ko Nuet Kaem ilak ani ura imi bitirikko agiting te beteman. Jesus kueram bare aking Kaem patowaram se barasam. 2 Ani, se aga Kris sikisaki agarak bagasan, mu den imi batagorman ale nina Kris kariimet Galatia bagasan mu ningarsan. 3 Anananga Nainet Kaem, nanga Biya Jesus Kristus ilak, nunga nongomang yawara, se nunga lila ningarmon se te bagaralko. 4 Kristus mu anananga Nainet Kaem ko ikia karo tuam, ale ana kilek memek aitakta ali imi te aniso se te bagaman ewere ko nanga bataguru taukko nanga ikup mu nu giam, ale kota numi memek te beteram ale kueram. 5 Buta se ana Kaem nup tom suen biya patawu se laganakko! Nunguning.

Den gilalong yawara suwanta, bo bo mena

6 Ani nina munan betesan wore ko ninguru biririkirem! Mu awuk, Kaem ninga auram ale Kristus nup te gomang ningaram, bare nina aking tairatela nu beteman, ale den bo kigilik karo tuiwasan. 7 Bare mu Kaem ko den gilalong yawara mena. Kari saki nenenga ikia ngualuwu se anisan. Nuna Kristus ko den gilalong yawara gurugumon se kelemak aratukko ago kaesan. ^{▼▼Gal 1:7-9 Juda kari saki kawelakasan ale iwita balukasan, Kris alo Law Den karo tumonko mu asele Kaem nunga giokko makasan: Acts 15:1.} 8 Bare ana agi, duruk te ko engel bo agi, tairuk den apurok, bare den umu den gilalong yawara motam la ana ninga manorman se ikiman mu turan mena, mu kari uwuta balso mu am tama ningi namurukko! 9 Ani maingkala balem turantala aking balsam: kari bo den gilalong bo ninga manuk, bare den umu den motam la nina taman mu turan mena, mu kari mu am tama ningi namurukkowo! ^{▼▼Gal 1:8-9 Ura kari kawel mu memek aringimonko: 2 Cor 11:13-15.}

10 Agi ani kariimet ago ko kuemonko den imi balsam e? Mena! Ani Kaem ago ko amilmilurukko ura imi betesam. E ani kariimet nongomang kulukuek se ani ago ko kuemonko negerik, mu ani Kristus ko ura kari nunguning mena.

Paul balam Kristus kota den gilalong yawara mu nu kausam mam

11 Aga sikisaki alo, ani diram ninga manorsam, den gilalong yawara ani ninga manarukasam mu kariimet nunga ikia te me aratam. 12 Ani kari bo kote me taem, se kari bo betela me aga kausam tala. Mena. Jesus Kristus kota aga kausam.

13 Nina ani ulengkala aguwaya bagakasam mu aga dugu duap ikiman. Ani Juda nunga munan ninguru karo tuikasam. Ani Kris kariimet nunga bita maguwurikko kari ani. Se nunga nongomang ningi nunguning Kristus ko anikaso mu sapomonko ko sail tagikasam. ^{▼▼Gal 1:13-21 Paul ko dugu duap: Acts 8:3; 9:1-6,15,26,30.} 14 Ani kari kulak saki aninga lagara suwan mu nunga kiarem, ale Juda nunga munan ninguru karo tuikasam. Ale anananga taleng girigir nunga munan aora biya anirukko ninguru sail tagikasam.

15 Bare girakala, tom aninga ayam me aga iluwa la, Kaem giram ani ago ko ikiam ale aga balu beteram. Nu gomang aisam, ale tom nu te ikiwaram mu te nu aninga aru tam, 16 ale ko Namar aga kausam, ale noko dugu duap sor saki ko kariimet wore nunga kausekko aga balam. Bare ani tom mu te kari bo ikia aga kausokko me isarukasam. 17 Ale betela, Jerusalem ningi kari giriman apostle ko arataman mu me nongote namakasam. Mena. Ani tairatela Arabia sor te namerem bagakasam. Ale udagi te pelerem Damascus namerem.

18 Udagi te yar ilagala suwan namaram asele ani Jerusalem Peter ilak munakirikko namerem, ale tom 15 ko ilak umutang te bagerem. 19 Bare mu te ani apostle sikina me nungarkem. Mu apostle James, Kari Biya Kristus ko uria, mu kota suwanta ani arigem. 20 Kaem aninga ikiwoso, ani me ninga kulursam, den ani balsam imi mu den nunguning.

21 Udagi te ani Syria se Cilicia ningi geragakasam. 22 Bare tom mu te Kris alo Judea ningi anikasan mu aninga aip ikikasan, bare amake me arikasan. 23 Nuna den imi la ikikasan, “Kari imi ulengkala nanga bita maguwu lagakaso, ale den gilalong yawara menawurokko ago kaeyakaso, bare borta aking aitak den mu balso!” makasan. 24 Ale nuna munan aninga angimik te aratam mu ko Kaem nup patawukasan.